Paytaxtın Nərimanov rayonu, 212 saylı orta məktəbin dəhlizində 11 yaşlı qıza qarşı seksual xarakterli zorakılıq hərəkətləri etməkdə şübhəli bilinən şəxs saxlanılaraq cinayət məsuliyyətinə cəlb edilib. Bu haqda bu gün, 29 oktyabr tarixində Avtosfer.az Daxili İşlər Nazirliyinin Mətbuat Xidmətinin şöbə rəisi, polis mayoru Elşad Hacıyevə istinadən məlumat verir.
DİN-in rəsmisi bildirib ki, hazırda araşdırma aparılır.
Daha öncə məlum olub ki, paytaxtın Nərimanov rayonunda yerləşən 212 saylı orta məktəbin şagirdi cinsi təcavüzə məruz qalıb. Hadisənin görüntüləri məktəbin müşahidə kamerasına düşüb. Bu barədə məktəblinin atası Samir Alıyev məlumat verib. Onun sözlərinə görə, 11 yaşlı qızı dərsdən sonra məktəbin dəhlizində onu gözləyirdi. Bu zaman naməlum şəxs ona qarşı seksual xarakterli zorakılıq hərəkətləri edib.
“Mən yolda olarkən həyat yoldaşım zəng edib dedi ki, qızım cinsi qısnamaya məruz qalması ilə bağlı mənə zəng edib, tez özünü məktəbə çatdır. Mən, məktəbə çatan vaxt həmin naməlum şəxsi tutdum və polisə təhvil vermək üçün onu zərərsizləşdirməyə çalışdım. Bu zaman, ətrafda olan insanlar bizim dava etdiyimizi düşünərək onu əlimdən aldılar. Həmin şəxs vəziyyətdən çıxaraq qaçıb getdi. Hadisənin videosundan hər şey aydın şəkildə görünür. Yaxınlıqda heç kimin olmadığını gördükdən sonra o, qızımın yaxasını açaraq cinsi qısnamaya məruz qoyub. Görüntüdən aydın şəkildə görünür ki, məktəbin nəzarətçisi həmin şəxsin kim olduğunu, məktəbə niyə daxil olduğunu soruşmur və bütün olanları kənardan izləyir”, – deyərək məktəblinin atası bildirib.
Samir Alıyev bildirir ki, məsələ ilə bağlı dərhal Daxili İşlər Nazirliyinin 102 qaynar xəttinə məlumat verib. Bundan sonra o, Nərimanov rayon 17-ci Polis Bölməsinə dəvət olunaraq izahatı alınıb.
