Bakı şəhəri, Nərimanov rayonu, F.X.Xoyski küçəsində yerləşən 6 mərtəbəli evdə yanğın olub. Hadisə nəticəsində bir nəfər xəsarət alıb. Bu haqda bu gün, 24 dekabr tarixində Bakuplus.az Fövqəladə Hallar Nazirliyinin (FHN) mətbuat xidmətinə istinadən məlumat verir.
Hadisə 23 dekabr axşam saatlarında baş verib. Altımərtəbəli yaşayış binasının beşinci mərtəbəsində yerləşən 40 kv.m sahəsi olan birotaqlı mənzilin yanar konstruksiyaları yanıb, yüksək temperaturdan hamam otağının plastik qapısı və plastik boru əriyib, 1 nəfər vətəndaş tüstüdən yüngül zəhərlənib.
Yanğın yerinə cəlb olunan FHN əməkdaşları alışmanı söndürüblər. Mənzilin qalan hissəsi və qonşu mənzillər yanğından mühafizə olunub.
İlkin araşdırmalara görə, yanğının saçqurudan fenin elektrik şəbəkəsinə qoşulu qoyularaq nəzarətsiz qalması nəticəsində baş verdiyi ehtimal edilir.
