Paytaxtın Nərimanov rayonu, Təbriz küçəsində yerləşən Şuşa İstirahət Parkında yeniyetmələr arasında kütləvi dava bıçaqlanma ilə nəticələnib. Bu haqda bu gün, 30 noyabr tarixində Bakuplus.az Lent.az-a istinadən məlumat verir.
15 yaşlı R.Y. bacısı ilə telefonda danışdığını iddia edərək H.Ə-ni münasibətləri aydınlaşdırmağa çağırıb. “Söhbət”ə çağıran oğlan görüşə iki dostu ilə gəlib. Oğlanlar arasında başlayan dava zamanı dostlardan biri turist bıçağı ilə H.Ə.-yə zərbə endirib.
Hadisəni törədənlər polis tərəfindən saxlanılaraq istintaqa təhvil veriliblər. “Xuliqanlıq, bir qrup şəxs tərəfindən və ya təkrar törədildikdə” maddəsi ilə təqsirli bilinən oğlanlar barəsində yetkinlik yaşına çatmadıqları üçün valideyn nəzarətinə verilməsi barədə qərar verilib.
Məhkəmənin ilkin iclası dekabrın 8-də baş tutacaq.
