Əmək və Əhalinin Sosial Müdafiəsi Nazirliyinin pulunu mənimsəyən Tural Alışanlı təcridxanada intihara cəhd edib. Bu haqda bu gün, 3 mart tarixində Qafqazinfo məlumat verib.
Nazirliyin sabiq işçisi və “Tua-TT” şirkətinin sədri Tural Alışanlı bu gün Bakı Ağır Cinayətlər Məhkəməsindəki prosesə gətirilərkən boğazı sarğılı olub. Verilən məlumata görə, o, boğazını kəsərək intihara cəhd edib. Lakin nəzarətçilərin səyi nəticəsində onun bu əməlinin qarşısı alınıb.
“Tua-TT” şirkətinin sədri Tural Alışanlı 5 il müddətinə azadlıqdan məhrum edilib. O, qardaşının adına tikinti şirkəti açıb. Daha sonra dövlət qurumundakı vəzifəsindən istifadə edərək Əmək və Əhalinin Sosial Müdafiəsi Nazirliyinin elan etdiyi tenderin qalibi kimi həmin şirkəti seçib. Beləliklə, əlil insanlar üçün yaşayış evlərinin tikilməsinə ayrılan 893.000 AZN vəsaitin 190.000 AZN-ini mənimsəyib.
