Bakının Nizami rayonu, Qara Qarayev prospekti ilə Şirin Mirzəyev küçəsinin kəsişməsində yerləşən meşə tipli parkda ağacların bəziləri quruyub, bəziləri isə kəsilərək yandırılıb. Yerdə isə ot örtüyündən əsər-əlamət yoxdur. Sakinlər deyirlər ki, park uzun müddətdir baxımsız vəziyyətdədir. Bu haqda bu gün, 19 yanvar tarixində Bakuplus.az ATV Xəbər-ə istinadən məlumat verir.
Sakinlərin sözlərinə görə, parkın bir hissəsi vaxtilə abadlaşdırılıb, qalan hissəsinə isə baxan yoxdur. Günü-gündən ərazidə tikilən obyektlərin də sayı artır. Nəticədə park həm də avtomobil dayanacağına çevrilib.
“Son vaxtlar ağaclar çox quruyur. Restoranların sayı da çoxalıb. Bəlkə ağaclar da qəsdən qurudulur ki, yenə kafe tiksinlər. Gecə bura gəlsəniz, iki cərgə yer yoxdu. Maşınların arasında bəlkə heç 50 sm yer qalmır”, – deyə sakinlər şikayət edirlər.
Nizami Rayon İcra Hakimiyyətindən (RİH) bildirildi ki, ərazi xüsusi nəzarətdədir və qorunur. Gələcəkdə burada yeni parkın salınması nəzərdə tutulur. Hələlik ərazidən keçən yüksəkgərginlikli elektrik xətləri bu işə mane olur. Bu problem aradan qaldırılandan sonra park salınacaq. Parkın ərazisində yerləşən qeyri-yaşayış obyektlərinə gəlincə RİH-dən bildirildi ki, 2000-ci illərin ortalarında tikilən bu obyektlər xüsusi mülkiyyətdədir.
