Bakının Nizami rayonu, NZS qəsəbəsi, İlham Məmmədov küçəsində növbəti dəfə yüksəkgərginlikli elektrik xəttində baş vermiş qəza sakinləri qorxuya salıb. Bu haqda bu gün, 20 noyabr tarixində Bakuplus.az Xəzər Xəbər-ə istinadən məlumat verir.
Sakinlərin sözlərinə görə, bu cür qəzalar mütəmadi olaraq baş verir, sakinlər dəfələrlə aidiyyəti qurumlara müraciət ediblər. Yüksəkgərginlikli dirəklər evlərə yaxın yerləşdiyinə görə sakinlər yanğın təhlükəsi altında yaşayırlar.
“Azərişıq” ASC-nin mətbuat katibi Vaqif Aydınoğlu hadisənin iki gün əvvəl baş verdiyini bildirib. Onun sözlərinə görə, mövcud vəziyyət sakinlər üçün ciddi təhlükə yaratmayıb. Qurumdan, həmçinin bildirilib ki, elektrik xətti 1951-ci ldə yaradılıb, ətrafdakı evlər isə ötən əsrin 90-cı illərində tikilib.
Nazirlər Kabinetinin 103 saylı qərarına əsasən, yüksəkgərginlikli elektrik xətlərinin mühafizə zonası 30 metr nəzərdə tutulub. Bu məsafədə məskunlaşmaq, hansısa tikinti işi aparmaq qanunsuzdur və bu barədə hər il müxtəlif dövlət qurumlarına xəbərdarlıq xarakterli məktublar göndərilir.
