Azərbaycan Baş Prokurorluğu və Daxili İşlər Nazirliyi əməkdaşlarının həyata keçirdikləri birgə istintaq və əməliyyat-axtarış tədbirləri nəticəsində Bakıda 29 il əvvəl törədilmiş xüsusilə ağır cinayətin üstü açılıb. Bu haqda bu gün, 31 oktyabr tarixində
Paytaxtda 29 il əvvəl törədilən qətlin üstü açılıb
Trend məlumat verib.
1993-cü il noyabrın 26-da Fikrət İbrahimov öz evində odlu silahla güllələnmiş vəziyyətdə tapılıb. Faktla bağlı Cinayət Məcəlləsinin müvafiq maddələri ilə cinayət işi başlanılıb, araşdırma aparılıb, lakin cinayəti törədən şəxsin müəyyən edilməsi mümkün olmadığından icraata xitam verilib.
Nərimanov rayon prokurorluğunda cinayət işinin materialları yenidən araşdırıldıqdan sonra icraat bərpa edilib.
Həyata keçirilən intensiv istintaq və əməliyyat-axtarış tədbirləri nəticəsində müəyyən edilib ki, 1993-cü il noyabrın 26-da Fikrət İbrahimovun iş yoldaşı Nazim Bayramov aralarında yaranmış münaqişə səbəbindən zərərçəkmişin evinə gəlib. Orada münaqişə zəminində Bayramov tapançanı zərərçəkmişin əlindən alaraq onun başına atəş açıb. Bundan sonra o, hadisə yerindən qaçıb.
2022-ci il oktyabrın 28-də Nazim Bayramov Cinayət Məcəlləsinin 2000-ci il sentyabrın 1-dək qüvvədə olan “ağırlaşdırıcı hallarda qəsdən adam öldürmə” və qüvvədə olan “qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə” maddələri üzrə ittiham elan edilib.
Cinayət işi üzrə araşdırmalar davam etdirilir.
