Paytaxtın Sabunçu rayonu, Pirşağı qəsəbəsində külli miqdarda narkotik aşkarlanıb. Bu haqda bu gün, 1 avqust tarixində Bakuplus.az APA-ya istinadən xəbər verir.
Dövlət Təhlükəsizliyi Xidməti və Dövlət Sərhəd Xidmətinin narkotik vasitələrin dövriyyəsinə qarşı keçirdikləri əməliyyat-axtarış tədbirləri nəticəsində İran vətəndaşları tərəfindən ölkə ərazisinə qaçaqmalçılıq yolu ilə keçirilmiş külli miqdarda narkotik aşkarlanaraq götürülüb.
Ümumilikdə 74 kiloqram 163 qram çəkisi olan qurudulmuş marixuananı qəsəbənin yol kənarındakı yaşıllıq ərazidən götürüb oradan uzaqlaşarkən Azərbaycan Respublikasının vətəndaşları – 42 yaşlı Vəli Qasımov, 36 yaşlı İsgəndər İsgəndərov, 31 yaşlı Aqşin Süleymanzadə və vətəndaşlığı olmayan 42 yaşlı Çingiz Daşdəmirov saxlanılıblar.
Faktla bağlı Cinayət Məcəlləsinin “Qabaqcadan əlbir olan bir qrup şəxs tərəfindən narkotik vasitələrin qaçaqmalçılığı” və “Qabaqcadan əlbir olan bir qrup şəxs tərəfindən külli miqdarda narkotik vasitələrin qaçaqmalçılığı” maddələri ilə cinayət işi başlanıb.
Hazırda araşdırmalar davam etdirilir.
