Bakıda kişi Daxili İşlər Nazirliyinin (DİN) qaynar xəttinə zəng edərək, gəlib binanı partladacağını deyib. Bu haqda bu gün, 4 noyabr tarixində Bakuplus.az Qaynarinfo-ya istinadən məlumat verir.
Verilən məlumata görə, Lənkəran rayonunda anadan olmuş 65 yaşlı kişinin həyat yoldaşı və qızı evdən çıxaraq bir daha geri qayıtmayıblar. Bununla bağlı o, Yasamal Rayon Polis İdarəsinin 28-ci Polis Bölməsinə müraciət edib, lakin aparılan araşdırmalardan narazı qalıb. Bu səbəbdən də 102 Xidmətinə zəng edərək, gəlib qurumun inzibati binasını partladacağını bildirib.
Həmin şəxs polis əməkdaşları tərəfindən saxlanılıb, ona protokol tərtib edilərək baxılması üçün məhkəməyə göndərilib.
Kişi məhkəmədə ifadəsində sərxoş olduğunu, 102 xidmətinə zəng edərək hədə-qorxu gəldiyini etiraf edib. Buna səbəb isə onun son vaxtlar üzləşdiyi ailə problemləri olub. O, polis bölməsinə dəvət olunanda sərxoş olduğunu və polislə mübahisə edərək tabe olmadığını bildirib. O, əməlindən peşman olduğunu və bir daha belə hərəkətlərə yol verməyəcəyini bildirərək, məhkəmədən onun barəsində yüngül inzibati cəza təyin olunmasını xahiş edib.
Məhkəmənin qərarı ilə o, 15 sutka müddətinə həbs edilib.
