Bakının Nizami rayonunun Qara Qarayev prospektində cərimə ilə razılaşmayan qadın həbs olundu. Bu haqda bu gün, 25 sentyabr tarixində Bakuplus.az Avtosfer.az-a istinadən xəbər verir.
Hadisə sentyabrın 23-ü saat 18:00 radələrində baş verib. Adıçəkilən ərazidə “Daewoo Centra” markalı avtomobilin sürücüsü Kənan Quluzadə işıqforun qırmızı işığında keçdiyinə görə Yol Polis Xidmətinin (YPX) əməkdaşları tərəfindən saxlanılıb. Sürücüyə protokol tərtib ediləndən sonra sərbəst buraxılıb.
Daha sonra sürücü bu barədə anasına xəbər verib. İttihama görə, Quluzadənin anası “KİA” ilə polisləri izləyərək patrul maşınının qarşısını kəsib və oğlunun səbəbsiz yerə cərimələndiyini bildirərək əməkdaşları təhqir edib.
Əraziyə cəlb olunan Post Patrul Xidmətinin (PPX) əməkdaşları xanım sürücü və oğlunu bölməyə aparıblar və qadına protokol tərtib ediblər.
Əlavə olaraq, xanımın nəqliyyat vasitəsinə baxış keçirilən zaman avtomobilin texniki vəziyyətinə dair tələblərin pozulması, ön və arxa faralarda plyonka olduğu, arxa şüşəsilənlərin olmadığı aşkar olunub. Bu səbəbdən xanım yenə cərimələnib, avtomobil isə cərimə meydançasına aparılıb.
Sonda xanım sürücü barəsində məhkəməyə müraciət olunub. O, “xırda xuliqanlıq” maddəsi ilə təqsirli bilinərək 5 gün müddətində inzibati qaydada həbs olunub.
