Paytaxtın Nizami rayonu, Keşlə qəsəbəsində kütləvi dava zamanı 2 nəfərin qətlində təqsirləndirilən Rauf Hüseynov, Ceyhun İsayev və Ramin İsayevin cinayət işi üzrə məhkəmənin istintaqı yekunlaşıb. Bu haqda bu gün, 25 yanvar tarixində Bakuplus.az Report-a istinadən məlumat verir.
İclas Bakı Ağır Cinayətlər Məhkəməsinin hakimi Azad Məcidovun sədrliyi ilə keçirilib. Proses zamanı prokuror Fariz Rzayev məhkəmədən təqsirləndirilən şəxslərdən Rauf Hüseynov və Ceyhun İsayevin ömürlük, Ramin İsayevin isə 5 il müddətinə azadlıqdan məhrum edilməsini istəyib.
Vəkillər müdafiə çıxışı üçün vaxt istəyiblər, növbəti iclas yanvarın 31-nə təyin edilib.
Hadisə ötən ilin 11 fevral tarixində baş verib. Kütləvi dava zamanı İlkin Rzayev və Xəyal Rəhimov qətlə yetiriliblər. Qətlə yetirilən İlkin Rzayev keçmiş polis əməkdaşı olub.
