Bakının Nəsimi rayonunda Vətən müharibəsi iştirakçısını qətlə yetirməkdə təqsirləndirilən Bəxtiyar Qarayevin cinayət işi Bakı Ağır Cinayətlər Məhkəməsinə göndərilib. Bu haqda bu gün, 1 dekabr tarixində Report məlumat verib.
Məhkəmə prosesi hakim Eldar İsmayılov tərəfindən aparılacaq. Məhkəmənin hazırlıq iclasının vaxtı hələlik məlum deyil.
Cari ilin avqust ayında “Kubinka” ərazisində Vətən müharibəsi iştirakçısı, 24 yaşlı Niyaməddin Muradov naməlum kişinin qadının əlindən telefon alaraq onu döyməsinin şahidi olmuşdu. Muradov dərhal həmin kişinin bu əməlinin qarşısını almaq üçün qadını müdafiə etməyə çalışmışdı.
Lakin o, naməlum şəxs tərəfindən ürəyindən bıçaqlanaraq aldığı yaralardan hadisə yerində dünyasını dəyişmişdi.
Niyaməddin Muradov “Qubadlının azad olunmasına” görə medalı ilə təltif edilmişdir.
