Suraxanı rayonu, Qaraçuxur qəsəbəsi, Yeni Günəşli yaşayış massivində torpaq sürüşməsi evləri dağıdıb. Bu haqda bu gün, 8 mart tarixində Bakuplus.az Baku TV-yə istinadən xəbər verir.
Sözügedən ərazi bir müddətdir təhlükəli zona sayılır. Burada sürüşmə ehtimalı yüksəkdir. 7 mart səhər saatlarından torpaq sürüşməsi nəticəsində yaşayış olan ev qismən uçub.
“Dəfələrlə gəlib, baxıb, gediblər. Ev qəzalı idi. Ev bərbad gündədir. Evdə xəstə var”, – deyə sakinlər bildirirlər.
Suraxanı rayon İcra Hakimiyətinin müavini əraziyə baxış keçirib və sakinlərə dərhal evi tərk etməli olduqlarını vurğulayıb, ancaq onlara köməklik göstərməkdən çəkinib.
“Siz bu gün buradan çıxın, hər dəqiqə hər şey ola bilər. Onun peşmançılığını hamımız çəkəcəyik. Sonra İcra Hakimiyyətinə gələrsiniz, baxaq, görək nə edə bilirik”, – deyə müavin qeyd edib.
Sakinlər qalmağa yerlərinin olmadığını dedikdə isə icra başçısının müavini qonaqlama üçün yerlərinin olmadığını bildirib.
