Qaradağ rayonunda yerləşən “Qoç et” KFT MMC-yə məxsus ət kəsimi sexində xadimənin ölümü ilə bağlı başlanmış cinayət işi üzrə məhkəmə prosesi başa çatıb. Bu haqda bu gün, 12 aprel tarixində Qafqazinfo məlumat verib.
Qaradağ rayon məhkəməsində keçirilən prosesdə şirkətin ət kəsimi sexinin rəisi, 44 yaşlı Vüsal Babayev “Əməyin mühafizəsi qaydalarını pozma - ölümlə nəticələnə bildikdə” maddəsi ilə ittiham olunub.
Ötən ilin 28 dekabr tarixində “Qoç Ət” MMC-yə məxsus ət kəsimi sexində xadimə işləyən 40 yaşlı Rəqsanə Pirməmmədova elektrik mikserini təmizlədiyi vaxt qurğu işə düşüb. Nəticədə o, mikserin hissələri arasında qalaraq hadisə yerində ölüb.
Prokurorluq ehtiyatsızlıqdan insanın ölümünə səbəb olan əməyin mühafizəsi qaydalarının pozulması ilə bağlı cinayət işi açıb.
Məhkəmədə mərhumun həyat yoldaşı bildirib ki, qadın hadisədən təxminən 15-20 gün əvvəl kəsim məntəqəsində işə başlayıb. O, qarşı tərəflə barışdığını, şirkətə və onun kəsim sexinin müdirinə qarşı şikayət və tələbinin olmadığını bildirib.
Qaradağ Rayon Məhkəməsi Vüsal Babayevi təqsirli bilib. Məhkəmənin hökmü ilə o, 3 il müddətinə azadlıqdan məhrum edilib. Cəza 2 il sınaq müddəti olmaqla şərti hesab edilib.
