Xəzər rayonunda öldürülərək quyuya atılan 4 yaşlı Məryəm Allahyarovaya işgəncə verməkdə təqsirləndirilən atası Taleh Allahyarovun cinayət işi üzrə məhkəmə prosesi başa çatıb. Bu haqda bu gün, 20 iyun tarixində Bakuplus.az Qafqazinfo-ya istinadən məlumat verir.
Xəzər Rayon Məhkəməsində keçirilən sonuncu iclasda Taleh Allahyarov 3 il 6 ay müddətinə azadlıqdan məhrum edilib.
İstintaq zamanı məlum olub ki, Allahyarov qızını mütəmadi olaraq döyüb, ona qarşı zorakı hərəkətlər edib, dəfələrlə çimdikləyib, siqareti bədəninin müxtəlif nahiyələrinə basıb, hətta boynuna uzatma kabeli dolayıb, həmin kabeli də tavana bağlayaraq boğucu hərəkətlər edib.
Qızın atası məhkəmə zamanı özünü təqsirli bilib, əməlindən peşman olduğunu söyləyib. O, həmçinin qeyd edib ki, o, həyat yoldaşının ondan ayrılmasına görə bu yola əl atıb. Allahyarov ümid edib ki, həyat yoldaşı övladına əzab verdiyini eşidərsə, geri qayıdacaq.
Daha öncə, ötən ilin fevralında 4 yaşlı Məryəmi qonşusu, 32 yaşlı Mehman Mansurov qətlə yetirib. Uşağı öldürüb quyuya atdıqdan sonra onun üstünə torpaq və daş ataraq izi itirməyə çalışıb. Hadisədən sonra azyaşlının atası da həbs edilib. O, Cinayət Məcəlləsinin “əzab vermə” və “əzab vermə işgəncə verməklə törədildikdə” maddələri ilə ittiham olunub.
Bakı Ağır Cinayətlər Məhkəməsinin hökmü ilə Mehman Mansurov 11 il müddətinə azadlıqdan məhrum edilib.
