Sabunçu rayonu, Ramana qəsəbəsində idarə rəisi tutulub.
Bakuplus.az APA-ya istinadən xəbər verir ki, Torpaqların qanunsuz zəbt edilməsinə və tikinti işlərinin aparılmasına şərait yaratmaqda təqsirləndirilən şəxs həbs edilib.
Belə ki, 2019-2020-ci illər ərzində Kənd Təsərrüfatı Nazirliyinin “Azəraqrar Dövlət İstehsalat və Emal Birliyi” MMC-nin Abşeron Regional İdarəsinin rəisi vəzifəsində işləmiş Arzu Təvəkkül oğlu Əliyev həmin qurumun balansında olan kənd təsərrüfatı təyinatlı torpaq sahələrinin qanunsuz olaraq çoxsaylı şəxslər tərəfindən zəbt olunmasında və tikinti işlərinin aparılmasında şərait yaradıb. Həmçinin himayədarlıq göstərilməsi müqabilində ona müraciət etmiş ayrı-ayrı şəxslərdən təkrarən külli miqdarda rüşvət almaqda şübhəli bilinir.
Aşkar olunan faktla bağlı cinayət işi açılıb, şübhəli şəxs barəsində həbs qətimkan tədbiri seçilib. Hazırda həmin cinayət əməllərinin törədilməsində iştirak etmiş digər şəxslərin cinayət məsuliyyətinə cəlb edilməsi istiqamətində işlər davam etdirilir.
