Sabunçu rayonu, Ramana qəsəbəsinin küçələri palçıq içindədir. Bu haqda bu gün, 21 fevral tarixində Bakuplus.az ATV-yə istinadən xəbər verir.
Söhbət qəsəbənin Müşfiq Qəribov küçəsindən gedir. Burada asfalt örtüyü olmadığından yollar yağıntı olan kimi palçıq içində olur. Maşınlar belə hərəkət etməkdə çətinlik çəkir.
“Qaloş geyinib gəzirik. Taksi gəlmir, uşaqlar məktəbə gedirlər, palçıq içində qayıdırlar. Bütün küçələr düzəlib, bir bura qalıb”, – deyə sakinlər şikayət edirlər.
Sürücülər də yollardan narazıdırlar. Onlar avtomobillərinə ciddi ziyan dəydiyini və tez-tez təmir etdiklərini vurğulayırlar.
Ramana Qəsəbə Nümayəndəsi Zülfüqar Mirzəyev məsələ ilə bağlı bildirilib ki, şikayətlə bağlı aidiyyəti quruma artıq müraciət göndərilib.
AAYDA isə həmin küçədə təmir işləri aparılmasının nəzərdə tutulmadığını qeyd edib.
“Müşfiq Qəribov küçəsi agentliyin balansında olmadığından təmir işinin aparılması hazırda nəzərdə tutulmur. Müraciət olunarsa, gələcəkdə küçəni təmir etmək olar”, – deyə qurumdan bildirilib.
