Respublika Perinatal Mərkəzində baş verən yanğından sonra Kliniki Tibbi Mərkəzə (KTM) təxliyə edilən 6 körpənin vəziyyəti ağırdır. Bunu KTM-in pediatr-neonatoloqu Aysel Qədimova deyib.
"Durumu ağır olan 6 körpədən 3-ü süni tənəffüs aparatına, digər 3-ü isə SİPAP aparatına qoşulub. Reanimasiyada olan körpələrin yaxın zamanlarda palataya köçürülmələri nəzərdə tutulmur".
KTM-ə təxliyə olunan körpələrin heç birində yanıq xəsarətləri aşkarlanmayıb. 15 körpədən 6-sı qız, 9-u isə oğlandır.
Həmçinin tüstüdən zəhərlənən 3 nəfərdən 2-sinin evə buraxıldığı məlum olub.
14:09 - Respublika Perinatal Mərkəzindən daha 16 körpə Yeni Klinikaya təxliyə edilib
Respublika Perinatal Mərkəzində baş verən yanğından sonra 5 hamilə, 9 zahı və 16 yenidoğulmuş təxliyə edilərək Yeni Klinikaya yerləşdiriliblər. Bu haqda klinikanın Neonatologiya şöbəsinin müdiri Əkbər Quliyev məlumat verib.
Onların vəziyyətləri stabildır, lazımi müdaxilə edilib və müalicələri davam edir.
13:32 - Respublika Perinatal Mərkəzindən Kliniki Tibbi Mərkəzə 26 körpə təxliyə edilib
Respublika Perinatal Mərkəzində baş verən yanğına görə 26 körpə Kliniki Tibbi Mərkəzə (KTM) təxliyə edilərək yerləşdirilib. Bunu KTM-in mətbuat katibi Ruzbeh Məmməd bildirib.
Uşlaqların vəziyyəti stabildir.
10:50 - TƏBİB: Yanğın zamanı Perinatal Mərkəzdə 4 uşaq ölüb - TƏCİLİ
Hadisə ilə bağlı cinayət işi açılıb. Bu barədə Baş Prokurorluq, Fövqəladə Hallar Nazirliyi və TƏBİB-nin birgə məlumatında deyilir.
İlkin məlumata görə, 3 nəfər tüstüdən zəhərlənmə səbəbi ilə Kliniki Tibbi Mərkəzin Toksikologiya şöbəsinə hospitalizasiya olunub. Onlara zəruri tibbi xidmətlər göstərilib, vəziyyətləri stabildir, ambulator müalicə üçün evə buraxılmaları nəzərdə tutulub.
Mərkəzin Yenidoğulmuşların intensiv terapiya şöbəsində müalicə alan 4 uşağın meyiti aşkar olunub.
Faktla bağlı “Yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda” və “Səhlənkarlıq iki və daha çox şəxsin ölümünə səbəb olduqda” maddələri ilə cinayət işi başlanıb.
Hazırda istintaq-əməliyyat tədbirləri davam etdirilir.
10:49 - TƏBİB-nin rəhbəri yanğın zamanı Perinatal Mərkəzdə olan xəstələrin sayını açıqlayıb
Respublika Perinatal Mərkəzində baş verən yanğınla bağlı stasionar müalicə alan xəstələrin sayı məlum olub.
Bu barədə TƏBİB-nin İcraçı direktoru Vüqar Qurbanov məlumat verib.
Onun sözlərinə görə, tibb müəssisəsində stasionar müalicə alan 90 nəfərdən 50-si təxliyə edilib. Qurbanov əlavə edib ki, xəstələrin təxliyəsi davam edir.
09:33 - Respublika Perinatal Mərkəzində yanğın: mərkəzdəki yanğının ilkin səbəbi məlum olub - VİDEO
İlkin ehtimala görə, yanğına səbəb kimi qısaqapanma olduğu bildirilir.
09:09 - Respublika Perinatal Mərkəzində yanğın: 100-dən çox insan təxliyə olunub
Bakı şəhəri Xətai rayonunun Yusif Səfərov küçəsində yerləşən Respublika Perinatal Mərkəzində yanğın baş verib. Bu haqda bu gün, 9 yanvar tarixində Bakuplus.az Fövqəladə Hallar Nazirliyinin (FHN) Mətbuat Xidmətinə istinadən məlumat verir.
Hadisə yerinə FHN-in yanğınsöndürmə briqadaları və xilasediciləri cəlb olunublar. 35 kv.m olan sahədə yaranmış alov qısa müddətdə söndürülüb. Fövqəladə hallar nazirinin müavini general-leytenant Etibar Mirzəyev yanğın yerinə gəlib.
Bununla yanaşı, DİN-in Mətbuat Xidmətindən bildirilib ki, ərazi tam mühafizəyə götürülməklə polis əməkdaşları təxliyyə-xilasetmə tədbirlərində fəal iştirak ediblər.
Hazırda polis əməkdaşları tərəfindən hadisə yeri mühafizə edilir. Verilən məlumata görə, körpələrlə bir yerdə 100-dən çox insan təxliyə olunub.
TƏBİB-nin İctimaiyyətlə əlaqələr və kommunikasiya departamentinin rəhbəri Zamirə Ədilovanın sözlərinə görə, bir nəfər - Respublika Perinatal Mərkəzinin mühafizəçisi tüstüdən zəhərlənmə səbəbi ilə Kliniki Tibbi Mərkəzin Toksikologiya şöbəsinə hospitalizasiya olunub. Ona zəruri tibbi xidmət göstərilir. TƏBİB rəhbərliyi hadisə yerindədir.
Respublika Perinatal Mərkəzində baş vermiş yanğınla əlaqədar hazırda Bakı şəhər prokuroru Elşən Abbasov və Azərbaycan Respublikası Baş Prokurorluğunun İstintaq İdarəsinin əməkdaşları hadisə yerindədirlər.
