Qafqazinfo-dan verilən məlumata əsasən, hadisə Bayıl qəsəbəsinin Gülbala Əliyev küçəsində yerləşən “My Music” hotelində baş verib.
Qaradağ rayonunun Lökbatan qəsəbəsində yaşayan Kənan Mustafayev, Orxan Əmirov, Nicat Cabbarlı və Xəzər Cabbarlı mayın 6-na keçən gecə istirahət məqsədilə hotelin restoranına gediblər. Onlar özləri ilə gətirdikləri “Black Jack” viskisini içərək orada aldıqları yemək və meyvə yeyiblər. Daha sonra onların vəziyyətləri ağırlaşıb. Verilən məlumata görə, ehtimal edilir ki, zəhərlənmənin səbəbi viskidir.
Saat 04:50 radələrində isə təcili tibbi yardıma müraciət edilib.
TƏBİB-dən bildirilib ki, həkimlər gələnə kimi Kənan və Orxanın vəfat etdikləri məlum olub. Nicat və Xəzər isə koma halında xəstəxanaya çatdırılıblar.
Report-dan verilən məlumata görə, Azərbaycan Qida Təhlükəsizliyi Agentliyindən bildirilib ki, zəhərlənmənin qida ilə heç bir əlaqəsi yoxdur.
Kliniki Tibbi Mərkəzin Toksikologiya Şöbəsindən Agentliyə verilən tibbi sənədə əsasən, həmin şəxslərin səhhətində yaranan problemin qida zəhərlənməsi ilə bağlı olmadığı öz təsdiqini tapıb.
15:35 - Səbaildə zəhərlənən 4 nəfərin kimliyi məlum olub
Səbail rayonunda yerləşən iaşə obyektlərinin birində zəhərlənənlərin şəxsiyyətləri məlum olub. Vəfat edənlər 26 yaşlı Kənan Mustafayev və 31 yaşlı Orxan Əmirovdur. Zəhərlənən digər iki nəfər isə 33 yaşlı Nicat Cabbarlı və 26 yaşlı Xəzər Cabbarlıdır. Onlar zəhərlənmə diaqnozu ilə xəstəxanaya yerləşdiriliblər.
Hazırda Səbail rayon prokurorluğunda araşdıma aparılır.
15:00 - Səbail rayonunda 4 nəfər zəhərlənib
Bakının Səbail rayonunda zəhərlənmə hadisəsi baş verib. Bu haqda bu gün, 7 may tarixində Bakuplus.az Bakupost.az-a istinadən xəbər verir.
4 nəfər məşhur hotellərin birində zəhərlənib. Onlar 1 saylı Şəhər Klinik Xəstəxanasına çatdırılıblar. Lakin həkimlərin səyərinə baxmayaraq, onlardan ikisinin həyatını xilas etmək mümkün olmayıb. İlkin məlumata görə, həmin şəxslər qidadan zəhərləniblər.
Verilən məlumata əsasən, sağ qalan şəxslərdən birinin adı Nicat, digərinin adı isə Xəzərdir. Onlar sinif yoldaşları olublar. Nicat Astara Gömrük İdarəsinin əməkdaşıdır. Xəzər isə hərbçidir. Onların vəziyyətinin ağır olduğu bildirilir.
