“Sədərək” ticarət mərkəzinin ərazisində yerləşən məscidin axundunun dəyişdirilməsinə etiraz edən Aydın Nağıyev həbs edilib. Bu haqda bu gün, 15 noyabr tarixində Report məlumat yayıb.
Qaradağ Rayon Məhkəməsinin qərarı ilə “polisin qanuni tələbinə qəsdən tabe olmamaqda” maddəsi əsasında sahibkar 15 sutka inzibati qaydada həbs olunub.
Noyabrın əvvəlində məscidə Fərid İsmayılzadənin axund təyin edildiyi məlum olmuşdur. 12 noyabr tarixində isə “Sədərək” TM-də çalışan iş adamı Aydın Nağıyev bu məsələ ilə bağlı ticarət mərkəzinin rəhbərliyinə etirazını bildirib. Oradan etiraz edənlərə bildirilib ki, axund Qafqaz Müsəlmanları İdarəsi tərəfindən təyin olunub. Nağıyev deyilənlərə inanmaq istəmədiyinə görə münaqişəni davam etdirib. O, ticarət mərkəzinin mühafizəçiləri tərəfindən döyüldüyünü iddia edib.
Qafqaz Müsəlmanları İdarəsi (QMİ) hadisəyə ilə bağlı açıqlama verib. Qurumdan bildirilib ki, məscid ticarət mərkəzinin iş adamlarının təşəbbüsü ilə tikilib və idarənin balansında deyil. Bununla bağlı QMİ açılan gündən etibarən məscidə axundu heç vaxt təyin etməyib.
