Bakının Sabunçu rayonunda quldurluq əməlini törətməkdə şübhəli bilinən şəxs saxlanılıb. Bu haqda BakuPlus.az Daxili İşlər Nazirliyinin (DİN) mətbuat xidmətinə istinadən bu gün, 7 dekabr tarixində məlumat verir.
Dekabrın 6-da saat 12:00 radələrində Sabunçu qəsəbəsi ərazisində “Toyota” markalı avtomobildə olan sərnişinin sürücünü bıçaqla hədələyərək ondan 30 manat pul oğurlaması barədə polisə məlumat daxil olub.
Polis əməkdaşlarının həyata keçirdikləri əməliyyat-axtarış tədbirləri nəticəsində quldurluğu törətməkdə şübhəli bilinən Bakı şəhər sakini E.Tağıyev müəyyən edilərək saxlanılıb.
Faktla bağlı Sabunçu Rayon Daxili İşlər İdarəsində araşdırma aparılır.
