Sabunçu və Ramana qəsəbələrini birləşdirən tuneldə yağış suları üçün nəzərdə tutulan dəmir barmaqlıqlar oğurlanıb. Bu səbəbdən həmin ərazidə sürücülər üçün təhlükəli olan çuxurlar əmələ gəlib. Bu haqda bu gün, 22 iyun tarixində Bakuplus.az ATV-yə istinadən məlumat verir.
Ərazidə avtomobillərin hərəkəti sürətlə həyata keçirilir, hər hansı bir sürücünün ani diqqətsizliyi qəzanı qaçılmaz edə bilər. Sürücülər deyirlər ki, lüklərin üzərində yağış barmaqlıqları olmadığından dəfələrlə avtomobillərin təkəri boşluğa düşür. Hətta bir neçə dəfə avtomobil qəzası da baş verib. Xüsusilə də axşam saatlarında bu yolda hərəkət etmək təhlükəlidir.
Məsələ ilə bağlı “Azərsu” ASC-dən bildirildi ki, həmin tunel onların balansında deyil.
Azərbaycan Avtomobil Yolları Dövlət Agentliyindən bildirildi ki, həmin əraziyə görə onlar cavabdeh deyillər.
Azərbaycan Yerüstü Nəqliyyat Agentliyi və Sabunçu RİH-dən də həmin ərazinin hansı qurumun balansında olduğunu dəqiqləşdirmək mümkün olmayıb.
Yəni həmin tunelə sahib çıxan qurum tapılmadı. Belə getsə, bu ərazidə avtomobil qəzaları qaçılmaz olacaq.
