Bakının Sabunçu rayonu, Zabrat qəsəbəsi, Ələsgər Şahbazov küçəsində sakinlər bərbad yollardan əziyyət çəkirlər. Bu haqda bu gün, 22 yanvar tarixində Bakuplus.az ATV News-a istinadən xəbər verir.
Sözügedən ərazidə kanalizasiya sistemi olmadığına görə çirkab sular yollara daşır, gölməçələr əmələ gələrək gediş-gəlişə problemlər yaradır.
Sakinlərin sözlərinə görə, onlar öz hesablarına müvəqqəti kanalizasiya xətti çəkmişdilər, ancaq məsələ həll olunmayıb. Üstəlik həmin yollardan ağır maşınların keçməsinə görə yol daha pis vəziyyətə düşüb.
“Yağış yağan zaman buradan, ümumiyyətlə, keçmək mümkün olmur. Hər gün maşın ustadadır. Neçə dəfə təmizləmişik, xeyri yoxdur”, – deyə sakinlər vurğulayıblar.
“Azərsu” ASC-nin mətbuat katibi Anar Cəbrayılovdan verilən məlumata görə, həmin ərazidə kanalizasiya infrastrukturu olmadığı üçün belə hallarda qurumun əməkdaşları hər hansı müdaxilə edə bilmirlər. Amma baş plana əsasən, yaxın gələcəkdə həmin ərazidə kanalizasiya infrastrukturunun qurulması nəzərdə tutulub.
