Bakı şəhər sakini Saatlıda silsilə oğurluqlar edib. Bu haqda bu gün, 22 sentyabr tarixində Bakuplus.az Daxili İşlər Nazirliyinin mətbuat xidmətinə istinadən xəbər verir.
Polis şöbəsinə daxil olan məlumata əsasən, sentyabrın 2-də gecə saatlarında rayon ərazisində yerləşən fərdi yaşayış evlərinin birindən 1500 manat dəyərində qızıl-zinət əşyaları, 2150 manat pul və bank kartları oğurlanıb. Keçirilən əməliyyat-axtarış tədbirləri nəticəsində hadisəni törətməkdə şübhəli bilinən Vüsal Vəliyev saxlanılıb.
Dindirilmə zamanı V.Vəliyev törətdiyi oğurluq faktını etiraf edib. Bundan əlavə, onun sentyabr ayının əvvəlində rayon ərazisində yerləşən mağazaların birindən ümumi dəyəri 4800 manatdan artıq olan qızıl-zinət əşyaları, bəzək və telefon aksesuarları, eləcə də 110 manat pul oğurlayaraq zərərçəkmişə maddi ziyan vurduğu da məlum olub.
Faktla bağlı cinayət işi başlanılıb, Vəliyev barəsində rayon məhkəməsinin qərarı ilə həbs qətimkan tədbiri seçilib.
