Suraxanı rayonunda müxtəlif cinayətlər törədən şəxslər tutulublar. Bu haqda bu gün, 7 may tarixində Bakuplus.az Daxili İşlər Nazirliyinə istinadən xəbər verir.
Aprel ayı ərzində keçirilən əməliyyatlar zamanı narkotiklərin satışı ilə məşğul olan 16, daşınması və dövriyyəsi ilə bağlı 39 şəxs saxlanılıb. Ümumilikdə 5 kiloqram müxtəlif növ narkotik vasitə və 300 ədəd psixotrop tərkibli həb dövriyyədən çıxarılıb.
Vətəndaşların şikayətləri əsasında həyata keçirilən əməliyyatlarla “Renault” markalı avtomobili qaçırmaqda şübhəli bilinən Sərdar Qəzənfərov, “Ravon” markalı nəqliyyat vasitəsini qaçırmaqda şübhəli bilinən Rəvan Rəhimov və Yeni Günəşli qəsəbəsində “Land Rover” markalı maşını qaçıraraq yol nəqliyyat hadisəsi törətmiş yetkinlik yaşına çatmayan daha bir nəfər tutulublar.
Bundan əlavə, Qaraçuxur qəsəbəsində “Chevrolet” və “Hover” markalı iki maşını yandıran Elgün Təhməzov və Zığ–Hava Limanı beton yolunun kənarında elektrik xətlərini oğurlayan Dövlət Həsənov saxlanılıblar.
Aşkarlanan hər bir faktla bağlı araşdırmalar davam edir.
