Paytaxtın Suraxanı rayonu, E.Bəkirov küçəsində sürücünün xəsarət alması ilə nəticələnən yol qəzası baş verib. Bu haqda bu gün, 3 iyul tarixində Bakuplus.az Fövqəladə Hallar Nazirliyinin (FHN) mətbuat xidmətinə istinadən məlumat verir.
“İsuzu” markalı avtobusla “Shacman” markalı yük avtomobilinin toqquşması nəticəsində avtobusun sürücüsü avtomobildə sıxılmış vəziyyətdə qalıb. Hadisə yerinə dərhal FHN-in Bakı Regional Mərkəzinin xilasediciləri cəlb ediliblər. Xilasedicilər 57 yaşlı Fariz Bayramovu xilas edərək təcili tibbi yardım briqadasına təhvil veriblər.
Hadisənin təfərrüatı araşdırılır.
