Azərbaycan Qida Təhlükəsizliyi Agentliyi (AQTA) Xətai rayonunda yerləşən çörək sexində yoxlama keçirib. Bu haqda bu gün, 9 mart tarixində agentliyin mətbuat xidməti məlumat verib.
Fiziki şəxs Əsədov Asim Ehtiram oğluna məxsus çörəkbişirmə sexinə baxış zamanı qida təhlükəsizliyi sahəsində normativ hüquqi aktların, sanitariya norma və qaydalarının tələblərinin pozulduğu aşkar olunub.
Müəyyən edilib ki, temperatur rejiminə əməl olunmaması, ventilyasiya sisteminin quraşdırılmaması, şəxsi heyətin tibbi müayinədən keçməməsi, xüsusi geyimlə təmin olunmaması məlum olub. Həmçinin etiketdə çörəyin çəkisi və digər məlumatlar göstərilməyib.
Aşkar edilmiş nöqsanlara görə qanunvericiliyə uyğun olaraq müvafiq tədbirlər görülüb, müəssisə rəhbəri barəsində inzibati protokol tərtib edilib.
