Xəzər rayonu, Qala və Binə qəsəbələri arasındakı yaşayış massivində insanlar suyun içində yaşayırlar. Bu haqda bu gün, 30 mart tarixində Bakuplus.az Xəzər Xəbərə istinadən məlumat verir.
Sözügedən ərazidə nə içməli su xətti var, nə də kanalizasiya sistemi. Qrunt suyu, yağan yağış və tullantı suyu heç yerə axmadığından sakinlərin həyətlərinə, evlərin zirzəmilərinə dolur. Bu da xəstəlik mənbəyinə çevrilməyə səbəb olur.
“40-50 sm hündürlüyə qalxır su. Evlər, millət bərbad gündədir. Hamı xəstədir. Yaşamaq mümkün deyil. Heç kim bura yiyə durmur”, – deyə sakinlər şikayət edirlər.
Vəziyyət o həddə çatıb ki, artıq mişardaşları həmin suya tab qətirmir və quma çevrilir.
Xəzər rayon İcra Hakimiyyəti məsələ ilə bağlı “Azərsu”ya müraciət olunduğunu bildirib. Sonuncu isə ərazinin qurumun balansında olmadığını və cari ilə hər-hansı planın olmadığını vurğulayıb.
