Xəzər rayonunda yağış suları üçün olan 18.000 manat dəyərində dəmir barmaqlıqlar oğurlanıb. Bu haqda 10 yanvar tarixində Daxili İşlər Nazirliyinin mətbuat xidməti məlumat verib.
Buzovna-Zağulba yolunda 1-5 yanvar tarixləri arasında naməlum şəxslər yolun kənarında yerləşən yağış sularının axıdılması üçün nəzərdə tutulan 136 ədəd dəmir barmaqlıq oğurlayıb. Hadisə nəticəsində yol infrastrukturuna 18.000 manata yaxın maddi ziyan dəyib.
Polis əməkdaşları tərəfindən həyata keçirilən əməliyyat-axtarış tədbiri nəticəsində Şahin Şəfaqətov saxlanılıb. Məlum olub ki o, oğurladığı dəmir barmaqlıqları metal qəbulu məntəqələrində satıb.
Faktla bağlı araşdırma davam edir.
