Paytaxtın Yasamal rayonunun sakinləri iddia edirlər ki, yaşadıqları Şamil Əzizbəyov küçəsi, 34 ünvanında açıq şəkildə narkotik vasitələr satılır. Bu haqda bu gün, 28 oktyabr tarixində YeniAvaz məlumat verib.
Yerli sakin Mirnağı Həsənovun sözlərinə görə, bu küçədə yaşayan Almaz adlı şəxs açıq şəkildə narkotik vasitələrin satışı ilə məşğuldur: “O gün gedib dedim ki, “Almaz əmi, burada mənim övladlarım, qardaşımın uşaqları, mənim kimi gör nə qədər insanın övladları böyüyür, narkotiki “saxla”. Dedi ki, "yox, get kimə istəyirsən müraciət elə, nə istəyirsən elə, mən öz işimdəyəm, davam edəcəm".
Polisə şikayət etdim, apardılar, 2 gün saxladılar, 3-cü gün buraxdılar. Bu gün (27 oktyabr - red.) mən 102-yə yenidən şikayət etmişəm, deyirlər ki, heç bir əsas olmadı. Dedim, “bütün bu videolar əsas deyil?” Belə dərd olmaz, uşaqlarımızı bayıra buraxa bilmirik”.
Daxili İşlər Nazirliyinin rəsmisi Nurlan Əliyev bildirib ki, ərazi nəzarətə götürülüb, araşdırma aparılır: “Videogörüntülərdən məlumatlıyıq. Araşdırma aparılır. Həmin iddialar yoxlanılır. Müvafiq tədbirin görülməsi təmin olunacaq”.
