Azərbaycanda 10 il əvvəl qətl törətməkdə təqsirləndirilən şəxsin məhkəməsi başlayıb. Bu haqda 18 iyul tarixində Report məlumat verib.
Yasamal rayonunda 2012-ci il oktyabrın 10-da Zöhrab Şirinov tanışı Cəfər Axundovla evdə narkotik vasitə qəbul etdikdən sonra sərxoş olublar və aralarında əvvəllər şəxsi münasibətlər zəminində baş vermiş mübahisə yadlarına düşüb. Nəticədə dava düşüb və Şirinov Axundovun qarın, sinə nahiyələrinə təpiklə zərbələr vurmaqla çoxsaylı xəsarətlər yetirərək onu qəsdən öldürüb.
Daha sonra törətdiyi cinayəti gizlədib və narkotik maddənin təsiri altında öz əcəli ilə ölməsi görüntüsünü yaradıb. Belə ki, həmin gün axşam saatlarında Cəfər Axundovun meyitini onun şəxsi avtomobilinin arxa oturacağına qoyub və Yasamal rayonu, “Qurd qapısı” adlanan ərazinin yaxınlığında yerləşən qəbiristanlığa aparıb. Daha sonra avtomobildə cibinə şpris və içərisində narkotik vasitə izləri olan şüşə dərman qabını yerləşdirməklə oradan uzaqlaşıb.
Lakin cinayətin üstü bu il açılıb və Zöhrab Şirinova qarşı CM-nin “Xuliqanlıq niyyəti ilə adam öldürmə” maddəsi ilə ittiham irəli sürülüb. Bu gün cinayət işi üzrə məhkəməsinin hazırlıq iclası keçirilib. Prosesdə təqsirləndirilən şəxsin anket məlumatları dəqiqləşdirilib. Məhkəmənin baxış iclası iyulun 25-nə təyin edilib.
