Bakının Yasamal rayonu ərazisində yerləşən mağazaların birində oğurluq hadisəsi baş verib. Bu haqda bu gün, 7 noyabr tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
Hadisə noyabrın 5-də baş verib. Bakı şəhər sakini olan qadının içərisində pulu və mobil telefonu olan pulqabısı oğurlanıb. Yasamal RPİ 26-cı Polis Bölməsinin əməkdaşları tərəfindən əməli törətməkdə şübhəli bilinən paytaxt sakini Z.Əliyeva saxlanılıb.
Araşdırma zamanı onun oğurluğa görə axtarışda olduğu, həmçinin noyabrın 4-də gözəllik salonlarının birində daha bir qadının çantasından 600 manat və 300 ABŞ dolları oğurladığı da müəyyən olunub. Araşdırma davam edir.
