Bakının Yasamal rayonunda su ilə dolu şar maşına ciddi ziyan vurub. Bu haqda bu gün, 5 oktyabr tarixində Bakuplus.az Xəzər Xəbərə istinadən xəbər verir.
Rayonda yerləşən binaların birində uşaqlar yuxarı mərtəbəyə çıxaraq oradan içərisi su ilə dolu şarı birbaşa avtomobilin üzərinə atıblar. Nəticədə maşının mühərrik hissəsinə ciddi ziyan dəyib. Avtomobil sahibi Cəfər Fərzullayevin sözlərinə görə, ona 5000 manatdan artıq ziyan vurublar.
C.Fərzullayev bildirib ki, hadisə bir neçə ay bundan əvvəl baş verib. Lakin bu günə qədər ziyanı heç kim qarşılamayıb. O, təmiri öz hesabına edib. İndi isə məbləğin tam ödənilməsini tələb edir.
“Mən istəyirəm ki, polis mənim məsələmə aydınlıq gətirsin ki, mən də məhkəməyə müraciət edə bilim”, – deyə o, əlavə edib.
Məsələ ilə bağlı Daxili İşlər Nazirliyindən bildirilib ki, hazırda fakt üzrə araşdırma gedir. Məsələyə yaxın zamanlarda hüquqi qiymət veriləcək və avtomobil sahibi bu barədə məlumatlandırılacaq.
