Bakının Nərimanov rayonu, Z.Bünyadov prospektində ölümlə və xəsarətlərlə nəticələnən ağır yol qəzası qeydə alınıb. Bu haqda bu gün, 4 fevral tarixində Report məlumat verib.
Paytaxt sakini, 42 yaşlı Gülnarə Eynullayeva avtomobillə hərəkət edərkən idarəetməni itirərək yolayırıcı səddi aşaraq əks istiqamətdə hərəkətdə olan, paytaxt sakini, 33 yaşlı Səid Qurbanovun idarə etdiyi avtomobillə toqquşub.
Hadisə nəticəsində Qurbanov yerindəcə keçinib. Eynullayeva və avtomobilində olan sərnişinlər - 23 yaşlı Nicat Bağırov və 42 yaşlı Səbuhi Abbasov xəstəxanaya yerləşdiriliblər.
Faktla bağlı “Yol hərəkəti və nəqliyyat vasitələrinin istismarı qaydalarını pozma, ehtiyatsızlıqdan zərərçəkmiş şəxsin ölümünə səbəb olduqda” maddəsi ilə cinayət işi başlanıb, istintaq aparılır.
