Bakıda noyabrın 7, 14, 21 və 28-də “Azərbaycan” CinemaPlus-da İsveç film günləri keçirələcək. Bu haqda bu gün, 2 noyabr tarixində Bakuplus.az Azərtac-a istinadən məlumat verir.
Film festivalı İsveç Krallığının ölkəmizdəki səfirliyi, İsveç İnstitutunun və Azərbaycan Kinematoqrafçılar İttifaqının birgə əməkdaşlığı çərçivəsində təşkil olunub.
Cədvəl:
7 noyabr – “Emiqrantlar” tammetrajlı bədii filmi (Erik Poppen). Film ailəsi ilə birlikdə İsveçdən Amerikaya mühacirət edən Kristina Nilssonun həyatından bəhs edir. “Yenidən başlamaq. Özünü yenidən yaratmaq. Bu mümkündürmü? Biz hansısa yeni ölkəyə köçürük, yoxsa ölkə bizə?” Kristina, ömrü boyu bu suallara cavab axtarır.
14 noyabr – “Cənnətdən gələn oğlan” tammetrajlı bədii filmi (Tarik Saleh). Film Qahirədə Əl-Əzhər Universitetində təhsil alan Adəmin dini və siyasi mübarizənin qurbanına çevrilməsindən bəhs edir.
21 noyabr – “Komediya kraliçası” tammetrajlı bədii filmi (Sanna Lenken). 13 yaşlı Saşa stendap-komediyaçısı olmaq istəyir. Onun əsas məqsədi anasının vəfatından sonra üzü gülməyən atasını güldürməkdir.
28 noyabr – “Hilma” tammetrajlı bədii filmi (Lasse Hallström). Film rəssam qadın Hilmanın həyatından bəhs edir. Film onun uşaqlıq dövründən başlayır və qəhrəmanın sənəti bütün dinlərə və mədəniyyətlərə mənsub insanlarla əlaqə quranda bitir.
Seanslar saat 19:00-da başlayacaq. Giriş sərbəstdir. Filmlər orijinal dildə Azərbaycan dilində altyazılarla nümayiş olunacaq.
