Azərbaycanlı rejissor Hilal Baydarovun “Balıqlara xütbə” (Sermon to the Fish) filmi Lokarno festivalının proqramına “Beynəlxalq müsabiqə” kateqoriyası üzrə daxil edilib. Bu haqda bu gün, 6 iyul tarixində filmin prodüseri Elşən Abbasov məlumat verib.
Bu il adıçəkilən festival avqustun 3-dən 13-dək baş tutacaq. Filmin dünya premyerası festival zamanı olacaq. Hilal Baydarovun “Balıqlara xütbə” filmi ən yaxşı filmə görə verilən “Qızıl bəbir” baş mükafatına namizədlərdən biridir.
Baydarovun Azərbaycan, Meksika, İsveçrə və Türkiyənin birgə istehsalı olan filmi 3500 müraciət arasından festivalda iştirak etmək üçün seçilib. Nəticədə “Qızıl bəbir” mükafatı uğrunda 17 film mübarizə aparacaq.
Layihədə Hilal Baydarov təkcə rejissor deyil, həm də ssenarinin həmmüəllifi kimi çıxış edib. Filmdə Rəna Əsgərova, Orxan İsgəndərli, Hüseyn Nəsirov rol alıblar.
Avropanın ən əlamətdar festivallarından biri olan Lokarno Festivalı hər il çoxlu sayda kinosevərləri, kinorejissorları və film rəyçilərini qarşılayır.
