London Royal Musiqi Akademiyasının professoru, truba ifaçısı Kristian Riçards Üzeyir Hacıbəyli adına Bakı Musiqi Akademiyasının tələbələrinə ustad dərsi təşkil edib. Bu haqda 10 iyun tarixində Bakuplus.az Bakı Şəhər Mədəniyyət Baş İdarəsinə istinadən xəbər verir.
Ustad dərsi zamanı Akademiyanın tələbələri Oruc Orucov, Səid Rəsulov, Fərid Hacıyev, Timur Xındırıstanskiy və Faiq Əlizadə iştirak ediblər. Onlar Çarı Nurımovun “Truba üçün konsert”, Daniil Qinetsinskinin “Yumoreska”, “Prelüdiya”, Alfred Şnitkenin “Köhnə stildə süita”, Astor Piatsolanın “El Viaje”, Vyaçeslav Şelokovun “Truba üçün konsert”, Anton Arenskinin “Konsert” valsı, Cüzeppe Tartininin “Truba üçün konsert” (ll, lll hissələr) əsərləri üzərində işləyiblər.
Ustad dərsində K.Riçards ifa zamanı nəfəsi düzgün idarə etməyin üsulları haqqında danışıb və tövsiyələrini verib.
