Dekabrın 1-də “Landmark” biznes mərkəzinin kinoteatrında "İrlandsayağı vidalaşma" qısametrajlı filmi nümayiş olunacaq. Təqdimat Böyük Britaniyanın Bakıdakı səfirliyi və “British Council” tərəfindən təşkil olunub. Filmin nümayişi Beynəlxalq Əlillər Gününə təsadüf edir. Bu haqda bu gün, 28 noyar tarixində Bakuplus.az Azərtac-a istinadən məlumat verir.
Tədbirdə əlillik məsələləri üzrə ekspert, "Müstəqil həyat" İnkişaf və Dəstək Mərkəzi İctimai Birliyinin rəhbəri Aydın Xəlilov iştirak edəcək, nümayişdən sonra tamaşaçılarla sual-cavab sessiyası keçiriləcək.
"İrlandsayağı vidalaşma" filmi “BAFTA 2023” mükafatının sahibidir. Filmdəki hadisələr Şimali İrlandiyanın kənd fermasında cərəyan edir. İrlandiyanı gənc yaşda tərk edən Tyorlou Makkeffri anasının ölümü ilə əlaqədar evə qayıdır. İndi o, Daun sindromlu kiçik qardaşı Lorkana baxmalıdır. Lorkan ailə fermasında qalmaq və işləmək istəsə də, Tyorlou onu İrlandiyanın ucqar əyalətində yaşayan xalasının yanına göndərmək istədiyini deyir. Yerli keşiş Oşi qardaşlara mərhum analarının arzularının yazıldığı siyahını açıqlayır. Lorkan yalnız Tyorlou ilə analarının yerinə yetirilməmiş istəklərini tamamladıqdan sonra fermanı tərk etməyə razılaşır.
