Azərbaycanın ilk inklüziv teatrı olan ƏSA Teatrı bu gün 6 yaşını qeyd edir. Bu haqda 3 sentyabr tarixində Bakuplus.az məlumat verir.
20-dən çox əlilliyi olan və olmayan istedadlı aktyor heyəti ilə fəaliyyət göstərən ƏSA Teatrı 3 sentyabr 2016-cı ildə rejissor Nihad Qulamzadə tərəfindən təsis olunub. Gənc olmasına baxmayaraq, teatr U.Şeksprin, C.Steynbekin, M.F.Axundzadənin, M.Meterlinkin, J.B.Molyerin, J.P. Sartrın, P. Turrinin əsərləri olmaqla 10 tamaşa və üç performans təqdim edib. 2016-cı ildən bu günədək ƏSA Teatrı yerli və xarici, dövlət və qeyri-dövlət qurumları ilə yaradıcı əməkdaşlıq edib.
ƏSA Teatrı öz fəaliyyəti ilə Azərbaycan mədəniyyətini dünyada uğurla təmsil edir. Teatr ötən il respublika üzrə keçirilən “4.4 Qısa Tamaşalar Festivalı”nda “Qonşu” tamaşası ilə birinci yerə layiq görülüb.
Qeyd edək ki, 7-ci mövsümə başlayan ƏSA Teatrı sentyabr ayından etibarən tamaşaçıların görüşünə gələcək. Teatrın ən böyük arzusu qarşıdakı mövsümdə kollektivin məkanla təmin olunmasıdır.
