Mələk Abbaszadə 1969-cu il oktyabr ayının 31-də Bakıda anadan olub.
Bakı Xoreoqrafiya Məktəbində, Ümumittifaq Dövlət Kinematoqrafiya İnstitutunun kino aktyoru fakültəsində (1990, A.Batalovun kursu) təhsil alıb. Universiteti bitirdikdən sonra bir il Azərbaycan Dövlət Rus Dram Teatrında çalışıb.
1992-ci ildə Azərbaycanda keçirilən gözəllik yarışmasında qalib gələrək Türkiyəyə dəvət alıb. Şimali Kiprdə 60-a yaxın ölkənin iştirakı ilə keçirilən “Miss dünya” yarışmasında “Zəriflik gözəli” nominasiyasını qazanıb. 1999-cu ildən Səməd Vurğun adına Azərbaycan Dövlət Rus Dram Teatrının aktrisasıdır.
O, “Bəyaz həyat” (2003, bədii serial), “Qızlar” (2007, bədii serial), “Kabusun gözüylə” (2010, tammetrajlı bədii film), “Qayınana” (III) (2011-2012, bədii serial), “Həkimlər” (2012-2013, bədii serial), “Həyat çiçəyi” (2014, bədii serial), “Şirin xəyallar” (2017, bədii serial), “Tərəddüd” (qısametrajlı bədii film) kimi ekran işlərində bir-birindən maraqlı rollar ifa edib.
Mələk Abbaszadə 2009-cu ildə Azərbaycan Respublikasının Əməkdar artisti fəxri adına layiq görülüb.
