Bu gün məşhur aktyor Elçin Həmidovun doğum günüdür. Sağ olsaydı, 64 yaşını qeyd edəcəkdi. Bu haqda 29 iyun tarixində Bakuplus.az məlumat verir.
Tanınmış aktyor Elçin Həmidov 29 iyun 1958-ci ildə Bakıda anadan olub. Körpə yaşlarından əvvəlcə atasını, sonra isə anasını itirən Elçini və bacı-qardaşlarını əmisi himayəyə götürüb. Bir müddət sonra Elçinin əvvəlcə bacısı, sonra isə qardaşları vəfat edib. Əvvəllər kuryer, daha sonra isə Azərbaycan Dövlət Musiqili Komediya Teatrında işıqçı, fəhlə işlərində çalışıb. Bir müddət sonra isə, yaxşı səsi olduğu üçün, teatrda xor artisti vəzifəsində çalışmağa başlayıb. 1977-ci ildə Azərbaycan Dövlət İncəsənət İnstitutunun Dram-kino aktyorluğu fakültəsinə daxil olub və 1981-ci ildə təhsilini başa vurub.
Tanınmış sənətçiləri parodiya etməyi isə başqa bir aləm idi. O, gülərüz simaya, əla bədən quruluşuna malik idi, onun ifasında qadın və kişi rolları çox koloritli alınırdı. İstedadlı aktyor, həmçinin "Planet Parni iz Baku" ŞHK teatrının əsas simalarından biri idi.
Elçin Həmidov heç vaxt ailə qurmayıb. Buna səbəb isə onun ölüm qorxusu olub. Həmişə deyirmiş ki, ciddi bir qadınla ailə qurmaq istəyirəm, amma qorxuram. Ölüb gedəcəm, o qadın yazıq tənha qalacaq.
2011-ci il martın 4-də istedadlı aktyor qəflətən dünyasını dəyişib. Həmin vaxt teatrda "Hərənin öz ulduzu" tamaşasının orkestrlə məşqi idi. Elçinin işə gəlmədiyini görən dostları onun evinə gediblər. Fövqəladə Hallar Nazirliyinin işçilərinin köməyi ilə qapı açılıb. Lakin həmin vaxt Elçin Həmidov artıq tək-tənha dünyasını dəyişmişdir. Aktyor martın 5-də Xırdalan qəbiristanlığında torpağa tapşırılıb.
