Xalq rəssamı Maral Rəhmanzadənin anadan olmasının 106 ili tamam olur. Bu haqda 23 iyul tarixində Bakuplus.az məlumat verir.
Maral Yusif qızı Rəhmanzadə 1916-cı il iyulun 23-də Bakı şəhərinin Mərdəkan qəsəbəsində sənətkar ailəsində dünyaya göz açıb. O, 1930-1933-cü illərdə Azərbaycan Dövlət Rəssamlıq Texnikumunda oxumuş, 1934-1940-cı illərdə Surikov adına Moskva Dövlət Rəssamlıq İnstitutunda təhsilini davam etdirmişdir. Professional rəssamlıq təhsili görmüş ilk azərbaycanlı qadın Maral Rəhmanzadə müasir milli rəngkarlıq məktəbinin inkişafında yüksək xidmətləri olan sənətkarlarımızdandır.
Maral Rəhmanzadə kitab qrafikası sahəsində diqqətəlayiq fəaliyyət göstərmişdir. Klassik şairlərimizdən Nizami Gəncəvinin, Şah İsmayıl Xətainin və Məhəmməd Füzulinin kitablarına verdiyi bədii tərtibatlar və çəkdiyi çoxsaylı illüstrasiyalar, həmçinin portretlər yüksək sənətkarlıq nümunəsi sayılır. Onun Xəzər mövzulu əsərləri geniş tamaşaçı auditoriyası tərəfindən yüksək qiymətləndirilmişdir.
Rəssam milli təsviri sənətin inkişafındakı böyük xidmətlərinə görə bir çox mükafatlara, o cümlədən “Şöhrət” ordeninə layiq görülüb. O, həmçinin Prezidentin fərdi təqaüdçüsü olub.
Maral Rəhmanzadə 2008-ci il mart ayının 16-da vəfat etmiş və Mərdəkan qəbiristanlığında torpağa tapşırılmışdır.
