Bakıda növbəti dəfə “Mədəni gənclik” layihəsi həyata keçirilib. Bu haqda BakuPlus.az Azərtac<-a istinadən bu gün, 13 may tarixində xəbər verir.
Azərbaycan Dövlət Akademik Milli Dram Teatrı növbəti dəfə “Mədəni gənclik” layihəsinə ev sahibliyi edib. Mirzə Fətəli Axundovun “Sərgüzəşti-vəziri-xani-Lənkəran” əsəri nümayiş olunub.
Tamaşanın quruluşçu rejissoru mərhum sənətkarımız, Əməkdar incəsənət xadimi Vaqif İbrahimoğlu, rejissoru Anar Sadıqov, quruluşçu rəssamı Əməkdar rəssam Rəşid Şərif, bəstəkarı Xalq artisti Siyavuş Kərimidir. Rəqslərin quruluşu Zakir Ağayev və Yelena Ağayevaya məxsusdur.
Tamaşa bitdikdən sonra izləyicilər kollektivlə görüşmək imkanı əldə ediblər.
Layihənin məqsədi gənclərin incəsənətə marağının daha da artırılması, onların ölkənin mədəni həyatında fəal iştirakının təşviq edilməsi, bir sözlə “mədəni gəncliyin” formalaşdırılması, milli mədəniyyətimizə sahib çıxacaq gənclər profilinin yaradılmasıdır.
Layihəyə ilk ev sahibliyini Səməd Vurğun adına Azərbaycan Dövlət Akademik Rus Dram Teatrı edib.
