Azərbaycan Prezidenti İlham Əliyev bu gün, 8 iyun tarixində Səbail rayonunda yeni salınan Çəmbərəkənd parkında yaradılan şəraitlə tanış olub. Bu haqda məlumat Azərbaycan Respublikası Prezidentinin rəsmi saytında yayılıb.
“Alov qüllələri” yaxınlığında, Həsən Seyidbəyli küçəsində istifadə olunmayan ərazidə salınmış yeni parkda yaşıllaşdırma işləri aparılıb, 1200 metr uzunluğunda piyada yolları salınıb. Parkda estakada üzərində piyadalar üçün 147 metr uzunluğunda körpü salınıb, şəhər mənzərəli iki terras düzəldilib, fəvvarə inşa edilib, ərazidə iaşə obyekti, sanitar qovşaq və inzibati bina tikilib.
Ərazinin relyefi nəzərə alınaraq, sürüşmənin qarşısını almaq üçün istinad divarı tikilib. Bundan əlavə, parkda idman və uşaq əyləncə qurğuları quraşdırılıb. 4 hektar ərazisi olan sahənin yaşıllıq zolağı qazonla örtülüb, 50 mindən çox müxtəlif növ ağac, kol və gül əkilib.
[URIS id=47778]
