Son vaxtlar sosial şəbəkələrdə Bakının ayrı-ayrı kəndlərində küftə-parça (küftə-bozbaş) verilən kafelərdən videolar paylaşılır. Balaxanıdan, Buzovnadan, Abşeronun başqa kənd və qəsəbələrindən paylaşılan videolarda küftənin məkanını hərə öz kəndinə bağlayır. Belə təqdimatlar başqa kəndlərin sakinlərində narazılıq yaradır. Bəzi rəylərdə deyilir ki, bu təamı hansısa kəndə bağlamaq olmaz, küftə bütövlükdə Bakı yeməyidir.
Bakı-Şirvan zonasında toylarda, yas yerlərində ta qədimdən qonaqlara təqdim olunan bu yeməklə bağlı nə bilirik? Bu mübahisələrin bir əsası varmı?
Globalinfo.az-a danışan Azərbaycan Milli Kulinariya Mərkəzinin baş direktoru Ceyran Əsgərovanın sözlərinə görə, Bakı küftəsini konkret hansısa kəndə aid etmək doğru deyil.
O, həmin yeməyin fərqli qaydalarla hazırlandığını bildirib:
“Hər kəndin öz küftəsi, öz özəlliyi var. Məsələn, bəziləri ölçüsünə görə fərqlənir, bəziləri formasına görə, elə kənd var ki, kartofu bütöv əlavə edir, eləsi də var ki, bölür.
Bundan başqa, bəzi kəndlərdə küftəyə darçın əlavə edirlər. Bu baxımdan kiçik fərqlər olur. Lakin iddia etmək olmaz ki, küftə məhz Bakının filan kəndinə məxsusdur”.
