Son illər artıq çəkidən əziyyət çəkən insanlar xilas yolunu cərrahi müdaxilədə görürlər. Xüsusən də xanımlar zərif görünmək üçün mədəkiçiltmə əməliyyatına daha çox maraq göstərirlər.
Dünyada, o cümlədən Azərbaycanda da bu üsulla artıq çəki dərdindən qurtulanlar az deyil. Lakin bu əməliyyatların fəsadları bəzən faciəli nəticələrə gətirib çıxarır. Hətta bəziləri bu əməliyyatı keçirən insanların sonradan xərçəng xəstəliyinə düçar olduğunu deyirlər.
Bəs görəsən, mədəkiçiltmə (bariatrik) əməliyyat hansı xəstəliklərə yol aça bilər? Əməliyyatın nə kimi riskləri var?
Mövzu ilə bağlı Bakuplus.az-a açıqlama verən aparoskopik-bariatrik cərrah Taryel Ömərov deyib ki, piylənmə əsrin qlobal xəstəliyinə çevrilib:
“Mədəkiçiltmə əməliyyatı dediyimiz bariatrik əməliyyat metobolik cərrahiyyənin bir bölümüdür. İnsanlar piylənməni xəstəlik kimi qəbul etmək istəmirlər. Bu əməliyyat 30 ilə yaxındır dünya dövlətlərində rəsmi olaraq qəbul olunub və tətbiq edilir. Dünyada orta hesabla il ərzində 450-480 min arası təkcə mədəkiçiltmə əməliyyatı həyata keçirilir. Ölkəmizdə 11 ildir belə əməliyyatlar 11 mərkəzdə icra olunur. 9 min nəfər mədəkiçiltmə əməliyyatı olunub və sağlamlığına qovuşub.
Bu əməliyyatların çox gözəl müsbət xüsusiyyətləri var. İdmandan və pəhrizdən effektiv nəticə ala bilməyən ağırçəkili, aşırı piylənmədən əziyyət çəkən xəstələr bir çox xəstəliklərə mübtəla ola bilərlər. Diabet, ürək-damar xəstəlikləri və qaraciyər yağlanması kimi problemlərin tam həllinə yönəlik əməliyyatdır. Yalnız pasiyentin istəyi ilə əməliyyat olunmamalıdır”.
T.Ömərov qeyd edib ki, piylənmə yaşama imkanlarını azaldır:
“Bu əməliyyatdan sonra diqqət etməli məqamlar ortaya çıxır. Əməliyyatdan 15 gün sonra pasiyentlərdə müəyyən problemlər əmələ gələ bilər. Tikiş xətti açıla, qanama mümkündür. Bu, dünya statistikasında qəbul və təsdiq olunan rəsmi göstəricidir. Buna görə də əməliyyatdan sonrakı dövrdə 4-5 həftə qidalanma proqramına diqqət etmək lazımdır. Bunu tövsiyə edirik.
Artıq çəkili insanlar problemli pasiyentlərdir. Piylənmə özü bir xəstəlikdir. Orqanizmin bir çox orqanının funksiyalarını, hüceyrələrini pozur. Əgər 120 kiloqramlıq və 60 kiloqramlıq pasiyentlər üzərində hər hansı əməliyyat aparırıqsa, ağır çəkililərdə bu daha risklidir”.
“Əməliyyatdan sonrakı dövrdə xəstəni ciddi diqqətdə saxlamaq lazımdır. İlk bir ay nəzarətdə qalmalıdır. Əməliyyatdan sonrakı bir il ərzində ciddi arıqlama baş verir. Xəstə effektiv nəticə görə bilir. Ağırlaşmaların olmaması üçün pasiyentləri beynəlxalq protokollara əsasən seçməliyik. Mütləq şəkildə izah etməli, diqqətdə saxlamalıyıq. İlk iki həftə mütləq şəkildə bəzi məqamlara diqqət etməliyik”, - deyə T.Ömərov fikrini tamamlayıb.
Nəzrin Vahid
