Azərbaycanda yaşa görə müavinətlərin artırılması təklif edilir.
Bu təklifi Milli Məclisin deputatı Vüqar Bayramov iqtisadiyyat.az-a açıqlamasında səsləndirib.
2025-ci ildə yeni sosial paketin icra edildiyini xatırladan deputat söyləyib ki, bu istiqamətdə büdcədən əlavə olaraq 1,4 milyard manat vəsait ayrılıb: "Üç milyondan çox vətəndaşımız 2025-ci ildə icra olunan beşinci sosial paketdən faydalana bilib. Artıq minimum əmək haqqı, minimum pensiya və sosial müavinətlər artıb. Həmçinin, təqaüdlərdə də artımlar var".
V.Bayramov buna görə də yaşa görə müavinətlərin artırılmasının həyata keçirilməsini təklif edib: "Çünki nəzərə alsaq ki, yaşa görə müavinət 65 yaşı olan, amma əmək pensiyası almaq hüququ olmayan vətəndaşlarımıza şamil olunur".
Deputat həmçinin onu da vurğulayıb ki, bu vətəndaşların xüsusən də həmin yaşlarda sosial dairəyə daha çox ehtiyacı olur: "Nəzərə almaq lazımdır ki, sosial paketin əsas fəlsəfəsi xüsusən də sosial dairəyə ehtiyacı olan vətəndaşlarımızın sosial müdafiəsinin daha da gücləndirilməsidir. Ona görə də biz bu istiqamətdə artımların həyata keçirilməsini məqsədəuyğun hesab edirik. Təbii ki, maliyyə imkanlarına uyğun olaraq artım faizləri müəyyənləşdirilə bilər".
V.Bayramov eyni zamanda hesab edir ki, bu istiqamətdə fiskal qiymətləndirmənin aparılmasına ehtiyac var: "Həm də bu sözügedən müavinətin artırılması əmək pensiyası almaq hüququ olmayan vətəndaşlarımızın sosial təminatının daha da yaxşılaşdırılmasına gətirib çıxara bilər".
