Dənizkənarı Milli Parkda yeni il şənlikləri ilə bağlı hazırlıq işləri yekunlaşdırılır. Bu haqda bu gün, 23 dekabr tarixində Report.az məlumat verib.
Bulvar ərazisində ağaclar və işıq dirəkləri çilçıraqlarla yeni il ab-havasında bəzədilir, müxtəlif oyuncaqlar qurulur.
Dekabrın 24-dən “Köhnə bulvar” ərazisində uşaqlar üçün əyləncəli-musiqili proqramlar təşkil olunacaq. Dövlət Kukla Teatrının arxasındakı ərazidə yeni illə bağlı kompozisiyalar hazırlanır (çilçıraqlı xizəkli maral, retro maşın, oyuncaqlar, hava ilə doldurulmuş oyuncaqlar və s.). Burada, həmçinin diskoteka, tamaşalar, konsert, atəşfəşanlıq, illüminasiya (işıq) və alov şousu da təşkil olunacaq. Uşaqların əyləncəsinə rəngarənglik qatmaq məqsədilə üzlərinin boyanması (feysart) da nəzərdə tutulub.
Dənizkənarı Bulvar İdarəsi tərəfindən təşkil olunacaq Yeni il şənliyi yanvarın 8-nə kimi davam edəcək.
