7 aprel Xalq yazıçısı Çingiz Abdullayevin doğum günüdür.
O, 1959-cu il aprelin 7-də Bakı şəhərində ziyalı ailəsində anadan olub. Bakıda 189 saylı məktəbini, Azərbaycan Dövlət Universitetinin hüquq fakültəsini bitirib.
Əmək fəaliyyətinə Bakı istehsalat birliyində hüquq məsləhətçisi, böyük hüquq məsləhətçisi və şöbə rəisi kimi başlayıb. Sonra Bakı şəhəri Əzizbəyov rayonu icraiyyə komitəsində şöbə müdiri, KP Qaradağ rayonu komitəsində təşkilat şöbəsinin təlimatçısı, siyasi-maarif kabinetinin müdiri vəzifələrində çalışıb. 1989-cu ilin fevralından Azərbaycan Yazıçılar İttifaqının katibidir. Beynəlxalq təcavüz problemi barədə dissertasiya müdafiə edib, hüquq elmləri namizədi alimlik dərəcəsi alıb. Polşanın Krakov Universitetinin fəxri professorudur. Sonradan beynəlxalq cinayət problemi barədə doktorluq dissertasiyası müdafiə edib. Azərbaycan PEN klubunun vitse-prezidentidir.
Çingiz Abdullayev 2009-cu il aprel ayının 7-də Azərbaycanın ədəbi həyatında fəal iştirakına görə "Şöhrət" ordeni ilə təltif edilib.
2014-cü ilin noyabr ayından İnterpolun fəxri səfiridir.
Rus dilində psixoloji və siyasi detektiv janrında əsərlər yazır.
Fransa, İsveç, Rumıniya, Estoniya, Latviya, Bosniya və Herseqovina, Serbiya, Albaniya, Ukrayna, Bolqarıstanda romanları çap olunub.
Yazıçının əsərləri toplu və jurnallarda rumın, Belarus, macar və alman dillərində işıq üzü görüb.
Çingiz Abdullayev Azərbaycan Respublikası Prezidenti İlham Əliyevin sərəncamı ilə 12 iyul 2005-ci ildə Xalq yazıçısı fəxri adına layiq görülüb.
