1965-ci ildə çəkilən “Dəniz” filmi “Azərbaycanfilm”in “Youtube” kanalında yenidən təqdim olunacaq.
Bakuplus.az xəbər verir ki, təqdimat bu gün saat 13:00-da baş tutacaq.
Qeyd edək ki, “Dəniz” sənədli filmi 1965-ci ildə C.Cabbarlı adına “Azərbaycanfilm” kinostudiyasında istehsal olunub.
Film 2023-cü ildə Oqtay Mirqasımovun 80 illik yubileyi ərəfəsində Azərbaycan Dövlət Film Fondu tərəfindən rəqəmsallaşdırılaraq elektron bərpa olunub.
Filmdə kadrarxası mətn yoxdur, danışan dənizdir. Kinooçerkdə dənizin həyatımızdakı önəmli rolundan bəhs edilir. Xəzər dənizinin sərvətlərindən lirik planda söhbət açılır, orada çalışan insanların cəsurluğu və romantik əməyi tərənnüm olunur.
Filmin rejissoru Oqtay Mirqasımov, ssenari müəllifləri Anar və Maqsud İbrahimbəyov, operatorları Zaur Məhərrəmov, Tofiq Sultanov və Boris Vlasov, bəstəkarı Emin Sabitoğludur. Məxsusi həmin film üçün yazılmış, sözləri Vaqif Səmədoğluna məxsus eyniadlı mahnını Anatollu Qəniyev ifa edir.
